Vllaznia ka gjobitur stafin teknik, trajnerin Brdaric dhe lojtarët titullarë, që kanë qenë pjesë e formacionit në ndeshjet e fundit. Shkak për këtë veprim janë bërë rezultatet negative, nga të cilat u humb kreu i Superiores, por rrezikon të “hidhen në erë” edhe Kupat e Europës. Përmes një njoftimi publik, KF Vllaznia bën me dije se këto gjoba janë me kusht: do të ekzekutohen vetëm nëse nuk vjen kthesa e skuadrës dhe nuk sigurohen Kupat e Europës:
Klubi i Futbollit Vllaznia, pas rezultateve të dobëta të ekipit në ndeshjet e fundit, të shoqëruara me performancë të dobët, analizoi me qetësi përgjegjësitë e të gjithë stafit teknik dhe lojtarëve të aktivizuar. Duke qenë se në asnjë rast penalizimi nuk përbën qëllim në vetvete, kemi marrë masa disiplinore dhe sanksione financiare me kusht që të ketë një mobilizim të gjithanshëm për rikthimin te rezultatet pozitive.
Masat përfshijnë stafin teknik dhe disa prej lojtarëve, të cilët besojmë se kanë të gjithë potencialin dhe mundësitë e duhura për të arritur objektivin që klubi i ka vënë vetes; pjesëmarrjen në Kupat e Europës. Të gjitha masat paralajmëruese ndaj stafit teknik dhe lojtarëve nuk do të aplikohen, nëse ekipi në ndeshjet kryesore në vazhdimësi do të arrijë të marrë rezultate pozitive, të cilat rrisin besimin tek publiku dhe garantojnë objektivin sportive”.
