Policia e Shkodrës arrestoi në flagrancë një 28-vjeçar i cili ishte paraqitur me një pasaportë të falsifikuar në pikën kufitare të Muriqanit.
Blutë bënë me dije se në pranga ra shtetasi E. J., 28 vjeç, banues në Mitrovicë, Kosovë.
“Ky shtetas është paraqitur në Pikën e Kalimit Kufitar Muriqan, për të kaluar drejt Malit të Zi, me një pasaportë bullgare që nuk është njohur nga pajisjet elektronike që përdoren për verifikimin e dokumenteve.
Pas një kontroll të imtësishëm në vijën e dytë rezultoi se pasaporta që ka paraqitur ky shtetas ishte e falsifikuar”, tha policia.
Gjatë kontrollit, këtij shtetasi iu gjet edhe pasaporta kosovare, me të cilën u bë i mundur identifikimi i tij.
Materialet iu referuan Prokurorisë së Rrethit Gjyqësor Shkodër, për veprën penale “Falsifikimi i letërnjoftimeve, pasaportave ose vizave”.
