Kryeministri Edi Rama ka komentuar sërish sot takimet e kryedemokratit Lulzim Basha, në vigjilje të nisjes zyrtarisht të fushatës elektorale për zgjedhjet e 25 prillit.
Nga Shkodra ku ndoqi procesin e vaksinimit, Rama tha, duke iu referuar mitingjeve të fundit të opozitës, se boritë, ulërimat dhe dy gishtat lart, janë histori të viteve ’90 që rikthehen sa herë në vend zhvillohen zgjedhje.
“Këto histori me bori ulërime e dy gishta janë histori të viteve 90 dhe përsëriten sa herë vijnë zgjedhjet”, u shpreh Rama.
“Jo, nuk janë sjelljet e partive politike sepse zakoni për t’i futur të gjithë në një thes është një sjellje e vjetër. Nuk ka lidhje fare sepse janë partitë e KÇK bashkë me dhëndrin përpara dhe gjinden spontanisht, dalin disa dasmorë me flamuj me dy dishta, me ulërima edhe krijojnë një vatër potenciale infektive në mes të qytetit. Këto janë gjëra që duhen shmangur, kjo është sfida e sfidave sepse nuk ka as parti as termina elektoral dhe asnjë lidhje me dallimet që kemi me çdo shoqëri tjetër në një botë normale”, vijoi kryeministri.
Kjo fushatë do të zhvillohet në kushtet e pandemisë COVID-19 dhe kufizimeve prej saj. Rama kishte një apel për qytetarët.
“Kjo është sfidë për shëndetin, nuk mund të rrezikohet shëndeti i askujt dhe të gjithë ata që bëjnë dasmorët duhet të ruajnë veten dhe të ruajnë të tjerët sepse këto histori me bori ulërime e dy gishta janë histori të viteve ’90 dhe përsëriten sa herë vijnë zgjedhjet a thua se këtu nuk ka ndryshuar asgjë. Faktikisht s’kanë për të fituar sepse kjo është arsyeja për të cilën ata humbën”, tha Rama.
