PSG mposhti 3-0 Lille dhe siguroi kualifikimin në çerekfinalet e Kupës së Francës. Një sukses i rëndësishëm përballë ekipit që kryeson Ligue 1 për ekipin e Mauricio Pochettinos.
Golat e fitores u realizuan nga Mauro Icardi dhe Kylian Mbappe (2x). Sulmuesi argjentinas zhbllokoi takimin në minutën e nëntë, teksa Kylian Mbappe dyfishoi katër minuta përpara fundit të pjesës së parë.
Ylli francez ktheu në gol një penallti dhe qetësoi trajnerin Pochettino. PSG menaxhoi avantazhin e dyfishtë në pjesën e dytë, teksa Keylor Navas priti një penallti në minutën e 78-të.
Në fund pati sërish shtesë për Kylian Mbappe. 22-vjeçari vulosi suksesin me “tris” të ekipit të tij në minutën e tretë shtesë falë një goli shumë të bukur.
