Partizani ia doli të triumfojë 1-2 në derbi ndaj Tiranës, duke lënë pas rezultatet negative që po kalonte skuadra. Natyrisht ashtu siç ndodh rëndom, derbi i kryeqytetit është një temë e nxehtë në futbollin vendas dhe diskutimet vijojnë edhe pas përfundimit të ndeshjes.
Pikërisht për këtë temë ka folur edhe, profesori dhe akademiku i njohur Përparim Kabo i ftuar në emisionin “Procesi Sportiv”. Ai deklaroi se të kuqtë e kishin përgatitur më mirë ndeshjen, dhe meritë për këtë ka padyshim Ilir Daja që fitoi duelin e drejtpërdrejtë me Shehin.
“Në gjykimin tim, Partizani e administroi më mirë lojën çka i dedikohet zgjuarsisë së Dajës. Partizani e asfiksoi Tiranën në pikën më të fortë, mesin e fushës. Tirana luajti me një ritëm më të ngadaltë dhe Partizani e futi në kurthin që i la gjysmën e fushës në 20 minuta e para dhe Tirana mendonte sikur e kishte vënë nën presion por që në fakt ishte një territor i lëshuar nga vetë Daja për të goditur në kundërsulm. Kjo dha rezultat në golin e dytë të Partizanit.
Megjithatë ndeshja nuk kishte diferenca të mëdha, mund të dilte edhe barazim nuk do të ishte çudi, Tirana edhe mund të shënonte pasi Partizani pas rezultatit 1-2 u tërhoq.
Nëse e shikojmë këto 10 vitet e fundit, gjykimi im është që sa herë që Partizani luan i tërhequr e godet Tiranën dhe kur rolet ndërrohen atëherë Tirana e godet Partizanin.
Pra është vështirë ta menaxhosh një ndeshje derbi duke luajtur ballas si një ndeshje shahu. Është një ndeshje që vendoset nga episodet dhe nga mençuria e atij që ndërton arkitekturën e lojës që është trajneri. Në këtë kuptim unë nuk them që e ka humbur Tirana ndeshjen ndaj Partizanit por e ka humbur nxënësi i Dajës ndaj Dajës pra trajneri që drejton aktualisht Tiranën (Orges Shehi)”. – ka thënë Kabo.
