Në javën e 30-vjetorit të rivendosjes së marrëdhënieve diplomatike midis Shteteve të Bashkuara dhe Shqipërisë, në rrjetet sociale e media është publikuar një dokument që tregon se si pushteti i asaj kohe përgjonte ambasadorin e parë amerikan në vendin tonë.
Shkresa daton më 13 Maj 1991 dhe mban firmën e kryeparlamentarit Gramoz Ruçi, asokohe ish-ministër i Punëve të Brendshme.
Në shkresë përshkruhen dy biseda telefonike private, njëra e ambasadorit të parë amerikan në vendin tonë William Edwin Ryerson dhe tjera e një zyrtari të kësaj ambasade. Duket se si ambasadori ashtu dhe të ngarkuarit me punë në ambasadën amerikane në vendin tonë kanë qenë në përgjim nga pushteti i kohës.
Këtë shkresë, Ruçi si ministër i Brendshme ia dërgonte Presidentit Ramiz Alia, më 13 Maj 1991, ku asokohe Partia e Punës sapo kishte dalë fituese nga zgjedhjet e 31 marsit 1991 dhe kryeministër ishte Fatos Nano.
“Për disa biseda telefonike të përfaqësuesve të ambasadës amerikane në Tiranë“, thuhet në kokën e dokumentit, që vijon me dy bisedat.
