Është luajtur java e 15-të e kampionatit të 21-vjeçarëve. Laçi vazhdon të tregojë formë të mirë dhe sot mori fitoren e radhës.
Bardhezinjtë fituan 2-3 në Fier përballë Apolonisë. Fatmir Prenga realizoi një dygolësh, teksa shënoi edhe Bruka për miqtë. Mariel Sota ishte autori i dy golave për Apoloninë. Vendi i dytë në renditje dhe 35 pikë për Laçin, teksa skuadra fierake renditet në vend të nëntë.
Vllaznia nuk u përmbajt aspak kundër Akademisë së Futbollit, ekip që e mposhti me rezultatin e thellë 6-0. Çoba realizoi një tregolësh, teksa golin e gjetën edhe Iviziku, Amuli dhe Leka.
Barazim 1-1 në përballjen Tirana-Teuta. Aliaj kaloi bardheblutë në avantazh në pjesën e parë, por Karepi evitoi humbjen e bregdetarëve me golin e realizuar tre minuta përpara fundit.
Dy takimet e tjera përfunduan me fitoret e skuadrave udhëtuese. Shënkolli mposhti 1-2 me përmbysje Dinamon falë golave të Dobrës dhe Hilës. Kastrioti luajti tenis përballë Football Republic. Ekipi krutan fitoi 2-6 dhe tre pikët e sotme e kanë ngjitur në vendin e shtatë me 20 pikë.
