Ndërsa në nëntor të vitit të shkuar ekspertët flisnin për një valë të dytë të shpërthimit të COVID 19 me numër shumë të lartë infektimesh dhe vdekjesh ditore, qeveria Rama miratoi mes një trumbetimi shurdhues vendimin për rimbursimin e ilaçeve anticovid për të gjithë të prekurit me një PCR pozitive.
Që prej atëherë deri më sot, kurba ka ardhur në rritje duke kulmuar në shkurt me një numër të frikshëm vdekjesh dhe infektimesh, ndërsa të gjithë ekspertët pranojnë hapur se numri real i të prekurve apo vdekjeve ishte disa herë më i lartë.
Kjo, për shkak dhe të trajtimit në banesë të qytetarëve të cilët refuzojnë trajtimin spitalor, por duke qenë dhe direkt kategoria përfituese për mjekimet e lëshuara nga mjeku i familjes.
Por çfarë ka ndodhur realisht në vend në mes të valës më të egër të pandemisë?
Sipas të dhënave që bëri sot publik Avokati i Popullit, për periudhën 19 Nëntor 2020 deri në 31 Janar 2021 Instituti i Shëndetit publik ka deklaruar se janë infektuar me koronavirus 47 982 persona, prej të cilëve kanë marrë recetë të rimbursueshme vetëm 2988 persona, pra rreth 6 për qind e të testuarve pozitivë (LEXO).
Shifra thellohet dhe më nëse marrim parasysh dhe pacientët të cilët janë trajtuar në banesë pa e pasur mundësinë të bëjnë një test të shpejtë apo PCR.
Sipas raportimeve të shumta për reporterët e terrenit, shumë të prekur të cilët kanë pasur nevojë për trajtim në shtëpi nuk kanë mundur të marrin përgjigjen e testit brenda javës së parë, duke i detyruar të mos mbështeten më tek receta modeste e rimbursueshme, por të kthejnë sytë nga kuleta e tyre.
E ndërsa ndonjëri ka pasur fatin të marrë përgjigjen e testit të tij disa ditë pasi sëmundja i ka kushtuar dhjetëra apo qindra mijë lekë, receta kushton disa herë më pak se dhe vetë mundi për të kontaktuar mjeken e familjes.
Një ironi therëse për një nga popujt më të varfër në Evropë, por që ka ‘luksin’ të paguajë gjithçka nga xhepi.
Edhe më therëse po të mendosh që Kuvendi i Shqipërisë miratoi në fund të vitit të shkuar dhe fondin shtesë prej 12 milionë dollarësh për trajtimin në banesë të sëmurëve me COVID 19.
Fondin e kemi, por paratë ku shkuan?!
/FaxWeb/
