Glorifikimi i sistemit komunist në Shqipëri nga e para në listën e kandidatëve për deputetë të PS për Tiranën në zgjedhjet e 25 Prillit – Luljeta Bozdo – ka sjellë reagime të shumta. Një ndër zërat që pozicionohet kudnër deklaratës së inxhinieres 78-vjeçare është akademikja Jonila Godole.
Në një reagim në rrjetet sociale, Godole kërkon një sqarim nga Bozdo për deklaratën: “Enver Hoxha i ka sjellë më shumë të mira se të këqija“.
Profesoresha e Fakultetit të Histori-Filologjisë në UT kërkon dhe reagimin e Partisë Socialiste për deklaratën që e quan të pavend.
Godole sjell në kujtesë rezolutat që janë miratuar nga parlamenti e që pohojnë krimet makabre të sistemit dhe mungesën e lirisë.
“Më e pakta që ajo mund të bënte është të kërkojë ndjesë publike për glorifikim të një regjimi që vrau, burgosi mijëra burra e gra, dhe internoi e persekutoi mijëra familje për gjysmë shekulli. Para kësaj panorame vrastare sistematike, gjithë ‘sukseset’ e tjera janë të papërfillshme. Ky nuk është modeli i përfaqësuesit të shtetit që mund t‘i ofrojmë brezit të ri dhe shoqërisë shqiptare”, shkruan Godole.
Ajo shton se deklarata e kandidates për deputete, në një kontekst të ngjashëm në një shtet demokratik perëndimor, në mos do të sillte pasoja deri edhe ligjore për këdo që relativizon apo glorifikon publikisht krimet e diktaturës, do të përballej me kritikë të prerë nga ana e një partie që operon mbi vlera demokratike.
“Sepse nuk mjafton vetëm që lista të ketë kandidatë të pastër, të parrokuptuar dhe pa lidhje kriminale, por edhe që ata të mos glorifikojnë e justifikojnë krimet e regjimit të djeshëm. Kush mbyll sytë para krimit të djeshëm, nuk e ka për gjë të justifikojë të sotmin. Përndryshe çdo premtim për pastërti figure është demagogji”, përfundon Godole.
(Në fotot më poshtë, reagimi i plotë)
