Mimi Kodheli renditet e 21 në listën shumëemërore të PS për qarkun e Tiranës, dy vendet më lart se Fatmir Xhafaj i cili ndodhet i 23 në të njëjtën listë.
Kodhelit mendohet se i duhen mbi 10 mijë vota që të pretendojë të marrë mandatin e deputetit, duke parakaluar në listë emrat që ndodhen në atë që mund të konsiderohen si të sigurta.
Në kuadrin e fushatës zgjedhore, duket se ish-ministrja e Mbrojtjes ka hapur thesin për të mbledhur sa më shumë vota mes votuesve socialistë. Madje ka arritur deri atje sa i konsideron socialistët e lagjes 13 edhe më shumë se njerëzit e saj të gjakut, duke i kërkuar të njëjtën gjë atyre deri ditën e zgjedhjeve.
“Besomëni, ju që jeni këtu prezent, bëni për familjen tonë të përbashkët socialiste dhe për mua personalisht, atë që familjarët e mi nuk do ta bënin dot. Prandaj unë ju konsideroj më shumë se njerëzit e mi të gjakut. Besojeni këtë. Dhe për pasojë, edhe ju duhet të më konsideroni ju nesër, që nga sot e deri atë ditë në të njëjtën mënyrë” u shpreh Kodheli.
Në këtë fushatë mund të dëgjojmë çudira deri më 25 prill, pasi për të siguruar një mandat deputeti kandidatët në lista mund të thonë gjithçka, mund t´i konsiderojnë votuesit më të rëndësishëm edhe se familjen e tyre. Kujdes, mos i besoni shumë, veçanërisht kur gjatë viteve të pushtetit personal apo partiak ju kanë kthyer kurrizin.
