Qeveria miratoi aktin-normativ ku i jep të drejtë ministrit të Shtetit për Rindërtimin, Arben Ahmetaj që të negociojë me vendet që prodhojnë vaksina anti-Covid. Sipas këtij akti, përvec ministres Ogerta Manastirliu, për vaksinat anti-Covid do të negociojë edhe ministri për Rindërtimin Arben Ahmetaj.
Përmes këtij akti Shqipëria mund të negociojë edhe me Kinën dhe Rusinë për vaksinat e tyre anti-Covid.
Në aktin normativ të miratuar në mbledhjen e Këshillit të Ministrave më 10 Mars dhe që hyn në fuqi menjëherë shkruhet “dhënien e autorizimit ministrit të Shëndetësisë dhe Mbrojtjes Sociale dhe ministrit të Shtetit për Rindërtimin për zhvillimin e negociatave me prodhuesit, me distributorë të autorizuar, me qeveritë ose institucionet e autorizuara prej tyre, të vendeve që prodhojnë ose distribuojnë vaksina anticovid, për të siguruar këto vaksina, të cilat janë të certifikuara nga trupa certifikuese në vendin e prodhimit të tyre”.
Deri tani Shqipëria po përfiton vaksina anti-Covid nga marrëveshja e drejtpërdrejtë me kompaninë Pfizer si dhe instrumentin Covax. Po ashtu negociata po bëhen edhe me kompaninë AstraZeneca.
