Mungesa të shumta në të dy kampet, por Manchester United-Milan mbetet një ndeshje spektakolare. Dy skuadrat e njohura do të përballen mes tyre nesër në Europa League, sfida e parë e raundit të 1/8-ve.
Trajneri i “Djajve të Kuq”, Ole Gunnar Solskjaer flet me admirim për kuqezinjtë italianë në konferencën për shtypin përpara duelit të ditës së enjte (18:55), teksa konfirmon edhe disa mungesa.
“Unë kam admirim të madh për Milanin. Ata janë një ekip tradite, kanë histori, cilësi dhe klas absolut. Në vitet e kaluara kanë shkruar faqe legjendare të futbollit.
Është e qartë që njësoj si edhe ne, ata ndodhen në një moment rilindje dhe rindërtimi. Milani është përqendruar te lojtarët e rinj, teksa i kanë shtuar ekipit dhe ekspertë si Ibrahimovic dhe Mandzukic.
Për momentin mungojnë këta dy lojtarë, por edhe ne kemi disa mungesa. David De Gea nuk do të luajë nesër, njësoj si Van De Beek dhe Juan Mata. Për Cavanin nuk jam i sigurt.
Mungon edhe Rashford. Markus nuk është stërvitur sot me ne dhe mendoj se nuk do të jetë i gatshëm për ndeshjen me Milanin“, deklaroi trajneri norvegjez.
