Pasi u treguan tepër aktivë në merkaton e janarit, pritej që Partizani të shpërthente në pjesën e mbetur të sezonit por kjo gjë nuk ka ndodhur, të paktën në tre javët e fundit.
Humbja kundër Skënderbeut, ishte një goditje e madhe për skuadrën e Ilir Dajës por lajmi i mirë për të kuqtë është fakti që edhe rivalët kanë “ngecur” në takimet e tyre. Diferenca me kreun është vetëm tre pikë por rezultatet e fundit shqetësojnë jo pak.
Këto ishin ndeshje dhe rivale, Apolonia e Skënderbeu, ku kryeqytetasit duhet të kishin marrë maksimumin përpara një kalendari asfiksues që nis këtë të shtunë me derbin kundër Tiranës.
Pas derbit, Partizani përballet me Laçin në çerekfinalet e Kupës së Shqipërisë, një ndeshje teke dhe shumë e rëndësishme, drejtori Rama theksoi pas shortin se ekipi i tij do të luftojë në dy fronte.
Tirana dhe Laçi janë vetëm dy pengesat e para, më pas përballen me Teutën dhe e mbyllin maloren në “Loro Boriçi” përballë Vllaznisë. Këto janë katër sfida më shumë se delikate, janë katër ndeshje që pritet të përcaktojnë fatin e Partizanit këtë sezon, jo vetëm në kampionat.
Pa shkuar kaq larg, në shtëpinë e kuqe janë të vetëdijshëm se një fitore në derbi mund të rikthejë gjërat në normalitet, për këtë arsye kjo përballje tretë sezonale pritet të jetë “zjarr” për të dy ekipet.
