Autoritetet greke kanë nisur një hetim mbi pretendimet e dhunës policore pas përplasjeve të ditëve të djeshme në Athinë.
Videot e shpërndara në mediat sociale tregojnë policinë duke kryer arrestimin e dhunshëm në një periferi të kryeqytetit grek. Imazhet treguan një të ri duke u rrahur me shkop nga një oficer policie, pasi të paktën tre oficerë të tjerë i qëndronin afër.
Burri mund të dëgjohet duke bërtitur “më dhemb”, ndërsa kalimtarët shprehin zemërim. Zyra e prokurorit publik të Athinës urdhëroi një hetim paraprak të hënën për të “ekzaminuar veprime të mundshme kriminale të kryera nga oficerë policie”. Sipas një deklarate të policisë, oficerët po kryenin kontrolle në Sheshin Nea Smyrni për respektimin e masave antiCOVID.
Policia thotë se ata kishin marrë “një numër ankesash” se po shkeleshin kufizimet në Sheshin Nea Smyrni. Pas përplasjeve, qindra njerëz u mblodhën të Dielën në mbrëmje për të demonstruar kundër “dhunës policore”. Protesta u shpërnda nga policia duke përdorur gaz lotësjellës. Incidenti ka gjeneruar një protestë nga shumë politikanë në Greqi, përfshirë ish-kryeministrin Alexis Tsipras.
Greqia ka regjistruar 6,758 viktima nga COVID-19 që nga fillimi i pandemisë, me më shumë se gjysmën në tre muajt e fundit dhe është përfshirë në një bllokim të rreptë të dytë që nga 7 nëntori.
