Më 9 mars 2020 në Shqipëri i konfirmua zyrtarisht pacienti i parë me koronavirus, edhe pse ka pasur mjaft debate lidhur me rastet e evidentuara nëmuajt janar dhe shkurt të të njëjtit vit ku pacientë të ndryshëm kanë pasur simptomat e ngjashme me koronavirusin.
Më 10 mars të gjithë qytetarët u njoftuan për politikën e re të bllokimit. Lëvizja e mjete private dhe publike u bllokuan, dhe të vetmet që lejoheshin të qarkullonin ishin ambulancat dhe automjetet për shpërndarjen e sendeve të domosdoshme. Dhe kështu muaj pas muaj, teksa shifrat rriteshin, edhe masat e qeverisë u shtonin.
Sot kur e gjithë bota është në luftë dhe në Shqipëri për 365 ditë janë 112 897 të infektuar në total prej të cilëve 75190 janë shëruar dhe 1939 persona kanë ndërruar jetë. Shkurti i 2021 është muaji i rekordeve të kësaj pandemie, me 25369 të infektuar dhe 416 viktima.
Rritja e rasteve me Covid-19 ditë më vonë çoi në ashpërsim të masave. Në 13 mars u ndalua lëvizja e lirë e qytetarëve, u mbyllën bare dhe institucione, ndërsa në rrugë doli policia. 4 ditë më pas qeveria vendosi të kalojë të gjithë vendin në karantinë totale fillimisht për një periudhë 2 javore dhe më tej ka vijuar me masa të përcaktuara në bazë të ecurisë së shpërndarjes së virusit vdekjeprurës.
Kryeministri Edi Rama shfaqej pothuajse përditë në media duke krijuar panik, ndërsa në vend të marrjes së masave shëndetësore, u zgjodh marrja e masave policore dhe ushtarake. E gjitha kjo çoi në evidentimin e mjaft rasteve të dhunës dhe shkeljes së të drejtave të njeriut, ndërsa pothuajse e gjithë Bota ishte në një garë për gjetjen e tamponëve, përmes të cilës mund të sigurohej gjurmimi i rasteve.
Një vit nga nisja e qarkullimit të Covid-19 në vend, shkollat vijojnë me mësimin e alternuar, universitete vetëm online dhe lëvizja e lirë është e ndaluar pas orës 20:00 deri në 06:00 të mëngjesit. Veç masave kufizuese për të parandaluar përhapjen e Covid-19 që prej 11 janarit ka nisur dhe injektimi i vaksinës anti-covid, fillimisht tek bluzat e bardha dhe të moshuarit mbi 80-vjeç dhe pritet të shtrihet tek mësuesit dhe personat mbi 65-vjeç. Deri më tani janë kryer 19,663 vaksinime, një shifër kjo mjaft e ulët bazuar në nevojat e popullsisë.
Gjithsesi ka një debat të hapur mbi shifrat e vdekjeve shkaktuar nga pandemia, pasi referuar shifrave të INSTAT për 2020, janë rreth 6 mijë vdekje më shumë se ato të një viti më parë, pra 2019. Po kështu ka debate mbi numrin e personave të infektuar nga Covid-19, kjo për faktin se nga fillimi i pandemisë nuk janë kryer testime masive, ato kanë qenë të kufizuara në numra dhe sot 1 vit nga shfaqja e virusit, nuk janë realizuar asnjëherë 5 mijë teste në ditë.
