Një tjetër denoncim vjen për trajtimin e pacientëve në spitalet kovid në vendin tonë. Një pacient i cili ka qenë i shtruar në spitalin e Sanatoriumit denoncon kushtet skandaloze në të cilat thotë se është trajtuar.
Ai thotë se brenda në spital ka pasur mungesë të ushqimit, dhe se e kanë nxjerrë para kohe nga spitali, përmes kërcënimit.
Andon Qako ka deklaruar se në dhomën e tij janë mbytur dy persona, por të gjithë këto deklarata të tij mbeten për t’u verifikuar, pasi janë shumë të rënda.
“Në dhomën time ishin dy persona, që i vranë, i mbytën, i akuzoj unë, e them publikisht. Nuk kishte ushqim të mjaftueshëm, në polici nuk mi morën parasysh denoncimet. Unë isha 100 kile, më jepnin ushqimin e atyre që ishin në gjendje të rëndë”, shprehet ish-pacienti i Sanatoriumit.
“Më nxorën para kohe nga spitali, u kurova dhe një muaj më pas në shtëpi”, deklaron më tej Qako. Fillimisht u shpreh se ka mungesë personeli brenda në spital, dhe më pas akuzoi bluzat e bardha për vrasje.
