VIDEO/ “Rilindja” shtyn sërish afatin e “rindërtimit”: Përfundon në pranverën e vitit 2022

“Rilindja” vijon të shtyjë afatin e përfundimit të procesit të rindërtimit të banesave të shkatërruara nga tërmeti i 26 Nëntorit 2019. Këtë të Premte, data e re e përfundimit të punimeve, e dhënë nga ministri për Rindërtimin Arben Ahmetaj, është pranvera e vitit 2022.

Në 27 Nëntor 2019, Rama do të deklaronte se procesi i rindërtimit mund të përfundonte brenda 2020-ës.

Në 16 mars 2020, kryeministri Edi Rama do të deklaronte se plani i rindërtimit as nuk do shtyhej e as nuk do ndryshonte për shkak të pandemisë së koronavirusit. Ai i qëndroi premtimit se procesi i rindërtimit do të përfunonte brenda vitit 2020.

Por, vetëm një muaj më vonë, kreu i qeverisë do të përgënjeshtronte deklaratat e bërë nga vetë ai.

Më 8 Prill, teksa inspektonte punimet në Thumanë, një nga zonat më të prekura nga tërmeti, Rama do të deklaronte se brenda vitit 2020 do ndërtohen vetëm banesat individuale dhe se ato kolektive do shtyheshin për një moment të dytë.

LEXO EDHE  Shqiptarët e majtë të rithemelojnë Partinë Socialiste

Sot, rindërtimi nuk ka përfunduar ende. Përfaqësuesit e qeverisë akoma mburren me pamje projektesh 3D, ndërsa ka ende qytetarë që vijojnë të zgjohen e ngrysen në çadra.

Këtë të Premte, u dha një tjetër afat. Ministri për Rindërtimin Arben Ahmetaj deklaroi se punimet do të përfundojnë në pranverën e vitit të ardhshëm.

“Në pranverën e vitit 2022 çdo gjurmë e tërmetit të 26 Nëntorit do të jetë fshirë. Shqipëria do të rilindë me një shkollë, shtëpi dhe lagje të re. Do të ketë rilindur edhe tek ato zemra që do të përfitojnë një shtëpi falas, një shkollë të re për fëmijët”, tha Ahmetaj.

/BoldNews.al/