Nga BoldNews.al
Kryeministri Edi Rama e prezantoi personalisht paraditen e kësaj të premteje konsorciumin që fitoi tenderin për ndërtimin e aeroportit të Vlorës.
Rama u shpreh se investimi qeveritar rreth 104 milionë euro do të realizohet nga një bashkim kompanish të regjistruara në Zvicër, e ku bëjnë pjesë “Mabetex” i Behgjet Pacollit”, kompania turke “Yda Group”, si edhe “2A Group”.
Kompania turke “YDA Grouo” është e njëjta që po ndërton një ndërtesë spitalore në qytetin e Fierit.
Ndërtimi i kësaj strukture spitalore, të cilën kryeministri Rama dhe Ministrja e Shëndetësisë preferojnë ta konsiderojnë “Spitali i Fierit”, u dakordësua gjatë një takimi që pak muaj më parë shefi i qeverisë dhe pjesa më e madhe e kabinetit të tij zhvilluan në Turqi me kryeministrin e atij vendi, Rexhep Taip Erdogan.
Në atë takim, Rama u tregua shumë “i surprizuar”, kur Erdogan deklaroi se spitali i ri i Fierit do të ndërtohej në një periudhë rekord, 3-mujore, afat që, për koincidencë, përkon me periudhën zgjedhore në Shqipëri.
Sipas të dhënave të prezantuara nga vetë Rama e më tej Manastirliu, struktura spitalore e Fierit do të ngrihet me fondet e qeverisë turke dhe është një dhuratë e Erdoganit për shqiptarët.
Por, në raportet ndërmjet shteteve është pak e vështirë të pranohet termi “dhuratë”, pasi gjithçka ka në mes interesa, sidomos tregtare dhe gjeostrategjike.
Dhe, “dhurata e Erdogan” nuk duket se është diçka e tillë. Kompania që po ndërton “dhuratën” e kryeministrit turk, këtë fundjavë u shfaq si një prej fitueseve për tenderin gjigand të ndërtimit të aeroportit të Vlorës.
Sipas Ministres së Infrastrukturës, Belinda Balluku, e cila parapriu me fjalën e saj Kryeministrin gjatë takimit informues të së Premtes, fituesi është konsorciumi “Mabco Construction (Mabetex Group) (50%) me aksioner Behgjet Pacollin; YDA – Group (48%) kompania që po ndërton spitalin e Fierit dhe 2A Group SH.PK (2%) kompani kosovare, ku vlera e investimit është 103.966.030 Euro.
