Ish futbollisti i njohur i Besës, Partizanit dhe Kombëtares, Përparim Daiu, në një intervistë për “Sport Magazine” në Ora News, komentoi ecurinë e kampionatit shqiptar dhe javën e 22-të që ka sjell grumbullim skuadrash në krye të tabelës.
Përparim Daiu: Një luftë mjaft e fortë po bëhet për kreun e tabelës së klasifikimit. Po shohim që, krahas kësaj lufte, po bëhet mjaft e luftuar edhe pjesa për rënien nga kategoria apo ajo e Play Out-it. Spikasin ndeshjet e Teutës karshi Vllaznisë dhe e Kukësit përballë Laçit. Ishin ndeshje që prodhuan spektakël por njëkohësisht dhe ngushtimin e diferencës së pikëve mes Vllaznisë, Teutës, Laçit ndërsa Partizani ishte një ekip që nuk përfitoi nga gabimi i Vllaznisë. Bëri një hap fals duhet të themi.
Sa i përket luftës për titullin kampion dhe hapit fals të “Demave të Kuq” kundër Apolonisë, Daiu u shpreh: “Është mjaft i rëndësishëm hapi. Duhet të ndjekësh hapin e skuadrave të tjera se një hap i gabuar do të ndikojë shumë në këtë luftë, që është ashpërsuar nga java në java. Për mua Partizani gaboi dhe shpresoj të mos gabojë në ndeshje të tjera pasi edhe ekipet e tjera do të jenë të kujdesshme, si Laçi dhe Teuta, në ndeshjet pasardhëse”.
