Lamtumirë Inter, “divorci” i bujshëm mes palëve vjen pas 25 vitesh

Ndërsa lufton për të fituar titullin e parë që nga viti 2010, duke prishur hegjemoninë e Juventusit, pas nëntë titujve radhazi, Interi vazhdon të transformohet. Grupi “Suning”, i cili njoftoi ndërprerjen e aktivitetit të tij të futbollit në Kinë me Jiangsu, po kërkon investitorë të rinj (negociatat me BC Partners vazhdojnë).

Në mars, me rastin e 113-vjetorit, klubi zikaltër do të ndryshojë edhe logon (stemën) e tij (stema e re ka rrjedhur tashmë dhe ka shkaktuar shumë polemika), ndërsa nga sezoni tjetër do të ketë tjetër risi në fanellat e lojtarëve. Për herë të parë pas 25 vitesh (dhe 235 milionë euro të investuara), prodhuesi historik i gomave “Pirelli” nuk do të shfaqet më në fanellat e skuadrës zikaltër.

Fanella e Interit në vitin 1995 me sponsor “Pirelli”
Ishte diçka për të cilën është folur tashmë, në muajt e kaluar, por konfirmohet edhe nga Marco Tronchetti Provera: “Ne do të ndalojmë së qeni sponsorë në fanellën e Interit, por do të vazhdojmë të kemi një marrëdhënie me klubin”. Sipas presidentit të “Pirelli”, grupi “Suning” duhet të mbështetet nga të gjithë: “Pronarët kinezë do ta respektojnë angazhimin e tyre ndaj Interit. Unë mendoj se ka propozime nga subjekte të gatshëm, që të bashkohen me klubin”. Një epokë e re do të fillojë së shpejti për interistët. Nuk do të ketë “Pirelli”, por tifozët shpresojnë që “scudetto” të shfaqet përsëri në fanellën e skuadrës së zemrës. Të besuarit e trajnerit Conte janë në rrugën e duhur për momentin.

LEXO EDHE  Pirlo: Ia bëmë të vështirë vetes, do e mendoj pozicionin e CR7