Thuajse një javë pasi u qëllua me një plumb gjatë shëtitjes që po bënte me 3 bulldogët e Lady Gagës, kujdestari i tyre, Rayn Fischer ka folur për herë të parë.
Fischer i cili ndodhet i shtruar në spital ka reaguar rreth sulmit që pësoi kur dy të panjohur tentuan të rrëmbenin tre bulldogët që ai kishte nxjerrë në një shëtitje.
BBC shkruan se ata arritën të merrnin dy bulldogë të Lady Gaga, Koji dhe Gustav. Një bulldog i tretë, Mis Azia, arriti të shpëtonte. Fischer tha se ajo ishte engjëlli i tij mbrojtës.
“4 ditë më parë, ndërsa një makinë u largua dhe gjaku derdhej nga plaga ime, një engjëll u zhyt dhe u shtri pranë meje. Britmat e mia në panik u qetësuan ndërsa shikoja Azian, edhe pse gjaku që grumbullohej përreth trupit të saj të vogël ishte i imi, “– shkroi ai.
Ai nuk harroi të falenderonte dhe këngëtaren për mbështetjen e dhënë ndaj tij dhe familjes së tij.
