Në më pak se dy muaj para zgjedhjeve të 25 prillit, Partia Socialiste kërkon që të ndryshojë ligjet kryesore të Reformës në Drejtësi.
Pavarësisht që në çdo deklaratë publike, zyrtarë të Rilindjes, e kanë cilësuar reformën në drejtësi si kalin e betejës, bashkë me rindërtimin dhe vaksinat, dhe nuk është çudi që edhe fushatën ta bazojnë pikërisht këtu, në Kuvend kërkojnë ndryshime ligjore pikërisht lidhur me ato që konsiderohen si institucionet e reja të reformës në drejtësi, por edhe ndryshimet në Kodin Civil dhe atë Penal.
Nga raportimet mësohet se projektligjet për ndryshimin e disa prej pikave kyçe të Reformës në Drejtësi janë firmosur nga deputetët Ulsi Manja, Alket Hyseni, Adnor Shameti dhe Klotilda Ferhati.
Këto ndryshime parashikohen të votohen në Kuvend në 15 mars dhe kërkojnë një shumicë të cilësuar prej 84 votash.
Referuar propozimeve, SPAK, nuk do të merret më me çdo lloj korrupsioni zyrtarësh, por do të vihet në lëvizje vetëm kur ryshfeti është më i lartë se 500 mijë lekë të vjetër. Për vlera më të ulëta do të merren prokuroritë e rretheve. Duket se ky ndryshim vjen pasi SPAK deri më tani vihej në lëvizje edhe kur një qytetar, për ti shpëtuar një mase administrative, tentonte të korruptonte punonjësin e policisë me 1 mijë lekë.
Duke parë kushtet në Gjykatën e Lartë e cila nuk është funksionale dhe pritet të ketë një numër të vogël gjyqtarësh për një volum të madh dosjesh, ndryshimet parashikojnë që mos të jetë e domosdoshme që të gjitha çështjet të shqyrtohen nga një trup prej 3 gjyqtarësh.
Në këtë kategori bëjnë pjesë, ekstradimet, kërkesat për rivendosjen në afat, kërkesat e palëve gjatë hetimeve paraprake si dhe kërkesa e prokurorit për pushimin e akuzës.
Në nismat e deputetëve socialistë, parashikohen edhe ndryshime në formulën e përzgjedhjes së Gjyqtarëve Kushtetues.
Disa prej projektligjeve, që synojnë të ndryshojnë socialistët:
PROJEKTLIGJ “PËR DISA SHTESA DHE NDRYSHIME NË LIGJIN NR. 7905, DATË 21.3.31995 “KODI I PROCEDURËS PENALE I REPUBLIKËS SË SHQIPËRISË”, TË NDRYSHUAR
PROJEKTLIGJ “PËR DISA SHTESA DHE NDRYSHIME NË LIGJIN NR. 97/2016 “PËR ORGANIZIMIN DHE FUNKSIONIMIN E PROKURORISË NË REPUBLIKËN E SHQIPËRISË”
PROJEKTLIGJ “PËR DISA SHTESA DHE NDRYSHIME NË LIGJIN NR. 8116, DATË 29.3.1996, “KODI I PROCEDURËS CIVILE I REPUBLIKËS SË SHQIPËRISË””, TË NDRYSHUAR
PROJEKTLIGJ “PËR DISA SHTESA DHE NDRYSHIME NË LIGJIN NR. 7895, DATË 27.1.1995, “KODI PENAL I REPUBLIKËS SË SHQIPËRISË”, TË NDRYSHUAR
PROJEKTLIGJ “PËR DISA SHTESA DHE NDRYSHIME NË LIGJIN NR. 8577, DATË 10.02.2000 “PËR ORGANIZIMIN DHE FUNKSIONIMIN E GJYKATËS KUSHTETUESE”, TË NDRYSHUAR”
PROJEKTLIGJ “PËR DISA SHTESA DHE NDRYSHIME NË LIGJIN NR. 98/2016 “PËR ORGANIZIMIN E PUSHTETIT GJYQËSOR NË REPUBLIKËN E SHQIPËRISË”
PROJEKTLIGJ “PËR DISA SHTESA DHE NDRYSHIME NË LIGJIN NR. 95/2016 “PËR ORGANIZIMIN DHE FUNKSIONIMIN E INSTITUCIONEVE PËR TË LUFTUAR KORRUPSIONIN DHE KRIMIN E ORGANIZUAR”
