Dy shqiptarë dhe 4 grekë, që dyshohet se ishin pjesë e një organizate që trafikonte kokainë në Paxos, u arrestuan nga policia, pas disa muajsh hetimesh nga Departamenti i Prokurorisë së Drogave të Nëndrejtorisë së Sigurisë së Korfuzit.
Sipas mediave greke, të arrestuarit dyshohet se kanë trafikuar 555 gram kokainë nga fillimi i tetorit të kaluar deri më sot.
Shqiptarët, të cilët u arrestuan të enjten në Athinë, dyshohet se kishin një rol kryesor në organizatë. Atyre iu gjetën një sasi kokaine me peshë 348 gramë dhe shuma prej 12.200 eurosh.
Sipas mediave, shqiptarët dyshohet se kishin pozicionet e “kryetarit” dhe “nënkryetarit” në organizatë.
Organizata siguronte kokainën në Athinë dhe më pas e rafikonte atë drejt ishullit Paxos, atje ku edhe e tregtonin me doza të vogla.
Ndërsa shtetasit grekë që u arrestuan dje në Paxos, dyshohet se janë bashkëpunëtorë të organizatës kriminale.
Ndaj tyre u ngrit një çështje penale për veprat e pjesëmarrjes në organizatën kriminale, si dhe furnizimin-posedimin-transportin-magazinimin-trafikimin e kokainës.
Të arrestuarit do të dërgohen në Prokurorinë Publike të Korfuzit.
