Sekretari i Përgjithshëm i PD, Gazment Bardhi, njëherazi edhe drejtues politik për Qarkun e Elbasanit, gjatë një takimi me studentët tha se largimi nga Shqipëria nuk është zgjidhja, ndërsa u shpreh se të rinjtë kanë në dorë ndryshimin.
Studentët ngritën shqetësime të përbashkëta për vështirësinë e shkollimit me tarifat e larta, mungesë e shpresës për punësim apo projektim të së ardhmes.
Bardhi u shpjegoi të rinjve se duke njohur këto probleme dhe energjinë e tyre për të ndërtuar jetën këtu, PD ka bërë plan konkret për uljen e tarifave, mbulimin e shpenzimeve me bursa për ata studentë që vijnë nga familje në nevojë.
“Ne do të ofrojmë mijëra stazhe me pagesë çdo vit, që janë paradhoma e sigurtë drejt punësimit. Do të investojmë në teknologji e laboratore e do të stimulojmë sipërmarrjet e reja. Elbasani nuk ka të neserme nëse studentët mbijetojnë çdo ditë, drobiten dhe humbin shpresën. Ne do t’i shohim si potencialin më të madh për zhvillim, për daljen nga qendrimi vendnumëro. Ju keni në dorë të ardhmen tuaj në 25 Prill dhe të ardhmen e Shqipërisë duke votuar ndryshimin”, tha Gazment Bardhi.
