Krejt ndryshe nga intervistat e shkuara dhe larg kostumit të një princi, Harry pranoi për herë të parë, atë që e quan të vërtetën e tij.
Në një intervistë 90 minutëshe për James Corden dhe emisionin “The Late Late Show”, princi britanik thotë se u detyrua të heqë dorë nga familja mbretërore vitin e shkuar, për shkak të shtypit britanik, që po i shkatërronte shëndetin mendor.
“Ne të gjithë e dimë sesi mund të bëhet shtypi britanik dhe kjo po më shkatërronte shëndetin mendor. Ishte toksike. Ndaj bëra atë që çdo bashkëshort e çdo baba do të kishte bërë”, deklaroi Harry.
Por Harry pranon se ai kurrë nuk do të shkëputet nga familja dhe detyrimet e tij, edhe pse prej një viti jeton në Los Anxhelos. “Jeta ime do të jetë gjithnjë në shërbim publik dhe Meghan e di këtë. Neve të dy na pëlqen kjo gjë”.
Por a ishte i detyruar të heqë dorë nga gjithçka familja mbretërore i ofronte? “Nuk do largohesha kurrë. Thjesht u tërhoqa dhe nuk u largova përgjithnjë. Ishte një ambient vërtet shumë i vështirë ,por kurrë nuk do braktisja familjen, pavarësisht vendimeve që u morën nga ana e tyre”, vijoi princi rebel.
Harry zbuloi po ashtu se sot, argëtimi i tij më i madh nuk janë më portalet apo shtypi, por seriali “The Crown”, dedikuar familjes mbretërore britanike, seritë e të cilit transmetohen në Netflix.
“Ndihem më shumë komfort me “The crown” sesa me historitë që shkruhen për mua, familjen apo gruan time. Pjesërisht bazohet tek e vërteta. Nuk është absolutisht ashtu, por ky serial të jep një ide konkrete për stilin e jetës, presionin e detyrës dhe shërbimit të familjes mbretërore”.
Prej janarit të 2020, Harry dhe Meghan kanë nisur një jetë të re në Shtetet e Bashkuara, larg syrit të medias dhe me angazhime të tjera, mes të cilave edhe bamirësia.
