Zbardhen detaje të reja nga atentati ndaj një shqiptari në Athinë, mbrëmjen e kaluar. Mediet fqinje raportojnë se shqiptari 32-vjeçar, që mbeti i plagosur në sheshin “Attika”, ishte arrestuar ditën e enjte në mëngjes, teksa ishte kapur në rrugën “Kreta”, duke udhëtuar me një biçikletë elektrike.
Ai kishte veshur një antiplumb dhe policia i kishte gjetur edhe një pistoletë të mbushur me fishekë. Pas arrestimit, ai ishte lënë i lirë me “detyrim paraqitje”, pasi kishte thënë para policisë se lëvizte me antiplumb dhe pistoletë se i rrezikohej jeta.
Siç shkruajnë mediet greke, ai kishte mbetur i plagosur rëndë në një tjetër atentat me armë, më 26 maj 2019, në stacionin e Larisas. Ai u lirua mesditën e të premtes, ndërsa u qëllua me armë në mbrëmje, por fatmirësisht shpëtoi.
Autorët e dyshuar të atentatit janë dy shqiptarë, të cilët më pas kanë marrë peng një shofer taksie, i cili i transportoi deri në stacionin e Larisas, prej ku u larguan me vrap. Shqiptari i plagosur rezulton me precedentë penalë në fushën e drogës dhe grabitjeve.
