Ish-Presidenti Bamir Topi është dorëhequr si Kryetar i partisë Fryma e Re Demokratike, e themeluar prej tij, pas largimit nga posti i Kreut të Shtetit.
Dorëheqja e Topit ka ardhur disa orë pas arritjes së marrëveshjes mes FRD dhe PD, për t´u përfshirë në një koalicion të përbashkët për zgjedhjet parlamentare të 25 prillit.
Dorëheqja e Topit është e parevokueshme dhe e menjëhershme. Në letrën e dorëheqjes Topi nuk jep arsyet, ndërsa më parë u raportua se ish-Presidenti pritet të jetë një prej kandidatëve për deputet në listën shumëemërore të Tiranës, që do përfaqësojë koalicionin me PD, por jo në atë që konsiderohet si lista fituese.
Ndërkohë marrëveshja me PD u firmos nga Sali Shehu, ish-deputet, i cili pritet të kandidojë për FRD në Qarkun e Dibrës, si pjesë e koalicionit
Nuk dihet nëse dorëheqja e Topit ka lidhje me marrëveshjen e arritur mes FRD dhe PD apo jo, por negociatat mes dy partive janë zhvilluar mes Sali Shehut dhe përfaqësuesve të PD. Më parë dy prej ish-themeluesve të FRD, Gazment Oketa dhe Aleksandër Biberaj, iu bashkuan PD.
