Rastet globale me koronavirus kanë rënë me 11% në javën që shkoi, deri në 21 shkurt. Duke shënuar kështu, javën e gjashtë radhazi të rënies së numrit të të infektuarve. Lajmin e bën të ditur OBSH në bazë të të dhënave që agjencia disponon.
Organizata Botërore e Shëndetësisë raportoi 2.4 milionë raste të reja dhe 66,000 fatalitete javën që lamë pas, duke regjistruar kështu një rënie prej 20% të vdekjeve nga një javë më parë. Kjo çon gjithsej në 110,7 milionë raste dhe më shumë se 2,4 milionë vdekje që nga fillimi i pandemisë së koronavirusit, sipas shifrave të OBSH, raporton CNN, përcjell abcnews.al
Shtetet e Bashkuara aktualisht po raportojnë numrin më të lartë të rasteve të reja, të ndjekura nga Brazili, Franca, Rusia dhe India. OBSH vuri në dukje se ndërsa shumë vende po raportojnë një rënie në rastet e përgjithshme të koronavirusit, të infektuarit me variantet e reja të virusit janë në rritje.
OBSH tha se varianti B.1.1.7 i zbuluar për herë të parë në Mbretërinë e Bashkuar tani është gjetur në 101 vende, ndërsa varianti B.1.351 i zbuluar për herë të parë në Afrikën e Jugut tani është gjetur në 51 vende. Varianti më pak i përhapur B.1.1.28.1, i identifikuar së pari në Brazil dhe Japoni, deri më tani është gjetur në 29 vende.
