Partia Demokratike nënshkroi sot marrëveshjet me drejtuesit e partive aleate, që do të përfaqësohen në zgjedhjet e 25 prillit me koalicionin “Shqipëria Fiton”.
Në dokumentin e firmosur nga drejtuesit e 5 partive aleate të PD me kreun Basha, ky i fundit zotohet se secila parti do të përfaqësohet në listën shumëemërore të kandidatëve me emra të propozuar prej tyre, bazuar në rezultatet e zgjedhjeve të mëparshme elektorale.
Poshtë emrit të koalicionit opozitar do të shkruhen emrat e partive që janë pjesë e koalicionit. Në kushte të tilla, kandidatët për deputetë do të jenë kandidatë të koalicionit “Shqipëria fiton” dhe jo të partive që i kanë propozuar.
Në dokument nuk përcaktohet numri i kandidatëve për secilën prej partive aleate, sikundër edhe numri rendor që do të kenë kandidatët në listën shumëemërore.
