Kryeministri Edi Rama ka debatuar në rrjetet sociale me ndjekësit e tij lidhur me vaksinat.
Ndërsa Shqipëria renditet ndër vendet e fundit në procesin e vaksinimit, ndërsa Kryeministri po e përdor për show dhe propogandë këtë proces, sot Rama u la derën hapur vaksinave ruse dhe kineze, por tha se nuk kanë marrë aprovimin e OBSH-së.
Deri më tani në Shqipër kanë mbërritur rreth 10 mijë doza vaksinash, nga mbi 40 mijë të tilla që deklaronte Rama se do të mbërrinin, ndërkohë që vaksinimi vijon me mjekët, të moshuarit mbi 80 vjeç, por edhe me kategori të caktuara, që herë shfaqen si personalitete dhe herë si shoferë personalë të Kreut të Urgjencës Kombëtare.
Njëri prej ndjekësve ironizon duke shkruar se për Ramën ka vetëm një alternativë, “Pfizer” ose qytetarët të vdesin.
“Derisa t’i vijë radha popullit të thjeshtë, numri i të infektuarve dhe shifra do shkojë si në Amerikë. Për Ramën, o Pfizer ose vdisni nga virusi. Nuk ka rrugëzgjidhje tjetër” shkruan qytetari.
Kreu i qeverisë i kërkon që të lexojë dhe të mos flasë pa lidhje. “Ku e degjove ti këtë apo ti hyn tek ata që kujtojnë se vaksinat janë si zarzavate nëpër tezga dhe jam unë që dua vetëm mollë jo dardha e qershia! Informohu mirë, degjo, lexo, kupto dhe mos fol pa lidhje”, i përgjigjet Rama.
