Kryeministri Edi Rama nga qyteti i Vlorës, ku prej dy ditësh po zhvillon takime, ka bërë të ditur se nuk ka ndërmend të largohet si Kryetar i PS-së.
Mbrëmjen e së enjtes dha edhe një intervistë për televizionin lokal “One TV Vlora”, ku edhe u pyet se kur do të largohet nga drejtimi i PS-së.
“Ne kemi një shprehje për hallën dhe xhaxhain. Unë nuk di të flas me nëse… Unë di që do t’i fitojmë zgjedhjet”, tha kryeministri.
Një nga pyetjet e para të moderatorit ishte se çfarë bilanci ka qeveria e tij në mandatit e dytë, i cili është duke u mbyllur. Sipas Ramës ky mandate nuk mund të quhet i plotë, pasi u godit në mes nga tërmeti dhe pandemia.
“Shumë parashikime që kisha u prenë prej tërmetit dhe pandemisë, por gjithsesi është i suksesshëm sa i përket menaxhimit të këtyre të dyjave. Ky mandate është mandate që më lë mua personalisht shijen e pakënaqësisë pasi kemi për të bërë shumë më tepër. Por të shohim nga u nisëm. Shqipëria që kemi sot nuk ka të krahasuar me atë që kishim para 7 vitesh”, tha Rama.
