Gjykata e Posaçme e Apelit pranoi kërkesën e Aleancës për Mbrojtjen e Teatrit duke urdhëruar SPAK që të kryejë hetime për kallëzimin e Aleancës për gjyqtarin Sokol Tona.
Ky i fundit pushoi hetimet për zëvendës kryetarin e Bashkisë Arbjan Mazniku.
Vendimi u konsiderua korruptiv nga Aleanca e cila e kallëzoi në SPAK. Në përfundim të seancës, përfaqësues të Aleancës e konsideruan vendimin si fitore.
Çështja
Prokuroria e Tiranës mbylli në dhjetor 2019 hetimet për çështjen e pagimit të qëndrimit në hotelin luksoz në Spanjë të Nënkryetarit të Bashkisë Tiranë, Arbjan Mazniku nga kompania Fusha shpk. Në dhjetor, gjykata pranoi kërkesën e prokurorisë për pushimin e çështjes.
Në shtator 2019, disa media publikuan një formular të fimosur nga Shkëlqim Fusha, i cili autorizonte Arbjan Maznikun të përdorë kartën e kreditit të Shkëlqim Fushës për të paguar shpenzimet e tij në Hotelin Alma në Barcelonë, më datë 21 qershor.
Me këtë dokument, Shkëlqim Fusha, pronari i kompanisë Fusha shpk, pagoi 1816 euro për qëndrimin e Maznikut, për dy netë në një hotel në Barcelonë.
