Një person i skeduar në çështje droge është mes të arrestuarve për vrasjen e shqiptarit Armando Beqiri në Islandë javën e kaluar.
Anton Kristinn, i cili sipas policisë ka qenë pjesë e botës së drogës për vite me radhë por edhe i dyshuar nga bandat si agjent i forcave të rendit, është ndaluar pas atentatit që ndodhi të shtunën e 11 shkurtit .
Ai ka mohuar të jetë i përfshirë në vrasje ndërkohë që policia ka vënë në pranga shtatë persona si të përfshirë në atentatin e kryer me armë me silenciator pranë banesës ku jetonte 33-vjeçari Armando Beiqiri.
Ai është ekzekutuar rreth orës 23:57 të së shtunës më 11 shkurt, sapo ishte kthyer në shtëpi dhe kishte parkuar makinën.
Autori i cili ka qenë duke e pritur ka qëlluar me më shumë se 5 plumba, pas shpine, në qafë dhe kokë.
Viktima i cili ishte pajisur me dokumente qëndrimi në Islandë dhe që nuk kishte precedent penalë punonte për një kompani të quajtur Top Guard ehf., e cila merret me sigurinë, ndërkohë që kolegët e kanë përshkruar shqiptarin si një njeri punëtor, i ndershëm, miqësor dhe i besueshëm.
Një fqinj tjetër ka thënë për median se kishte parë njerëz që shpesh hynin e dilnin nga shtëpia e shqiptarit.
Policia ka ngritur dyshime se krimi mund të ketë ndodhur për ndonjë konflikt të vjetër drogë ndërkohë që shefi i policisë Margeir Sveinsson, ka thënë se një prej të arrestuarve është personi që ka shkrepur armën por nuk përjashtohet mundësia që më shumë se një person të ketë qëlluar mbi shqiptarin.
Vrasja konsiderohet si një nga krimet më të vështira të viteve të fundit në Islandë për tu zbardhur si për autorësinë ashtu edhe për motivin.
