Pediatrja Gjeorgjina Kuli tha mbrëmjen e sotme në studion e “Open” se gjatë muajit janar-shkurt të 2021 janë infektuar me Covid-19 rreth 700 fëmijë.
Kuli tha se deri në Janar të 2021 kemi pasur 1200 fëmijë të prekur me koronavirus.
Ajo tha se aktualisht në repartin e trajtimit të fëmijëve nga Covid janë ezauruar rreth 80 % të shtretërve në këtë pavion.
“Përgjithësisht fëmijët e kalojnë lehtë, por mund të ketë edhe komplikacione, pasi një foshnje 1 muajshe me një temperaturë, natyrisht që mund të krijojë probleme. Ka një hospitalizim që shkon nga 10-14 ditë dhe përgjithësisht kanë shkuar mirë. Dy fëmijë janë në gjendje të rënduar, por jo në intubim”, tha Kuli.
Sipas saj, janë konstatuar rastet kur fëmijët kanë pasur probleme 1 muaj pas infektimit të fëmijës.
“Nëse temperatura për mbi 3 ditë vijon, atëherë fëmija duhet të kontrollohet nga mjeku. Kemi pasur raste të rënda, të prekjes së të gjithë organeve të fëmijës, jo vetëm të mushkërive, por edhe të veshkave dhe zemrës”, tha Kuli. Sipas saj, ka pasur edhe prekje të sistemit nervor të fëmijëve.
Mjekja e njohur e shpjegoi këtë gjendje të krijuar me përgjigjen autoimune që kanë fëmijët ndaj Covid.
” E kalojnë koronavirusin, por pas 1 muaji shfaqin probleme. Moshat deri në 6 vjeç mund të preken nga sëmundja e njohur si kavasaki, kemi pasur 2-3 raste në Shqipëri. Mosha nga 10 deri në 13 vjeç kemi pasur një kuadër të plotë klinik të koronavirusit”, tzha Kuli.
