Kryeministri Edi Rama ka zgjedhur të ironizojë opozitën lidhur me dështimin e strukturave të shtetit dhe qeverisë, qendrore apo lokale, për bllokimin e rrugëve nga reshjet e dëborës dhe ngricat.
E ndërsa qindra qytetarë mbetën të bllokuara në akse të ndryshme rrugore në 48 orët e fundit, Rama thotë se rrugët bllokohen në të gjithë Europën por në Shqipëri nuk është e lejuar.
“Janë disa gjëra që nuk i zgjedhim në jetë. Na vijnë. Po ti e di që gomarin nuk e lënë as mizat. Bie bora gjithandej nëpër Europë. Bllokohet gjithë Europa.
Këtu nuk duhet të bllokohet asnjë minutë. Këtu duhet të vëmë plastmas. Tani më e keqja iku. Vuajtët por shyqyr jeni mirë me shëndet të gjithë. Tani në çadër keni qëndruar ca kohë. Po shyqyr iku një e keqe e madhe. Këtu po punojnë por mizat nuk na lënë”, tha Rama.
Komentet Kryeministri i bëri gjatë një vizite në familjen e një qytetari, banesa e të cilit u ndërtua në kuadrin e programit të rindërtimit, ndërsa vetë Rama ka marrë rolin e një drejtori strehimi që shpërndan çelësat.
