Lëvizje e papritur në merkato! Futbollisti i Kombëtares, Odise Roshi largohet nga kampionati rus pas 5 vitesh, teksa do të vijojë karrierën në Hungari.
Anësori fierak ka arritur marrëveshjen me klubin e DVTK mbrëmjen e kësaj diele, teksa ditën e martë do të udhëtojë drejt Hungarisë, për të hedhur firmën mbi kontratë, raporton “Supersport”. Te DVTK Roshi do të ketë shok skuadre futbollistin tjetër të Kombëtares, Hysen Memolla, i cili ndeshjet e fundit ka humbur edhe vendin e titullarit.
Momentalisht ekipi i ri i fierakut, renditet në vendin e fundit me 17 pikë në 21 ndeshje, në kampionatin që kryesohet nga Ferencvaroshi i Uzunit me diferencë +14 nga vendi i dytë.
Kujtojmë që këtë sezon Roshi është aktivizuar vetëm 6 takime me skuadrën e Akhmat Groznit, teksa është duke rifituar formën optimale, pas dëmtimit që e mbajti jashtë për një kohë të gjatë. 29-vjeçari ishte pjesë e skuadrës ruse që prej vitit 2016 ku në total numëron 84 ndeshje dhe 11 gola.
