Mentor Mazrekaj, aktualisht futbollist i Laçit, ishte mbrëmë i ftuar në emisionin “Rubrika Sportive” ku foli për këtë sezon të tij fantastik me kurbinasit.
Por ndër të tjera, ai u kthye pas në kohë duke kujtuar kohët e arta me Partizanin. Veç spektaklit me të kuqtë, ai pati probleme edhe me ish-trajnerët Sampaio dhe Adolfo Sormani.
Fantazisti tregoi se ata kishin të drejtë për llogarinë që kërkonin, megjithatë sipas tij, disiplina është ajo që e ka penalizuar për të qenë në nivele të larta.
“Unë nuk e di. Fitonim me Partizanin dhe dilnim të gjithë duke festuar. Si për çudi vetëm unë përfundoja në gazeta. Pastaj me ata trajnerët e huaj gjithmonë kam pasur probleme. Për shembull me Sormanin dhe si e ka pas ai portugezi, Sampaio.
Ata ishin në rregull se kërkonin disiplinë, ishin mësuar me disiplinë. Por, ata harronin se ku ishin këtu. Nëse unë do isha i disiplinuar, s’do kisha qenë në Superligë”, përfundoi ai.
