Mentor Mazrekaj ka rinovuar edhe për 2 vite me skuadrën e Laçit. Mesfushori i kurbinasve e zbuloi vetë një gjë të tillë mbrëmë në emisionin “Rubrika Sportive” duke theksuar se është treguar besnik i bardhezinjve pikërisht për mundësinë e dhënë për t’u rikthyer pas disa vitesh në futbollin shqiptar.
Lajmi i rinovimit të tij kishte dalë prej ditësh, por detajet ka preferuar t’i zbulojë vetë fantazisti. “Unë kam rinovuar me Laçin. U jam mirënjohës për mundësinë që më dhanë, ndaj bashkë me kryesinë vendosëm të rinovonim për 2 vitet e ardhshme”, tha ai në panel duke habitur edhe të ftuarit që ishin në dijeni për një marrëveshje 1-vjeçare.
32-vjeçari është aktivizuar në 16 ndeshje në këtë sezon, 5 prej të cilave i ka nisur nga minuta e parë. Ai ka arritur të shënojë 4 gola dhe ka dhënë 3 asiste me mjaft vlera për ekipin e tij. Edhe pse presidenti i Partizanit Gaz Demi e tha hapur që do ta kishte dashur në ekip lojtarin, por mbyllja e merkatos e penalizoi, tanimë me rinovimin e kontratës “shtegu” drejt të kuqve është thuajse tërësisht i mbyllur.
