Jemi vetëm tre ditë larg zgjedhjeve parlamentare në Kosovë dhe të gjitha indiciet e deritanishme favorizojnë Albin Kurtin si kryeministrin e ardhshëm të vendit.
Për këtë temë u diskutua në “Opinion”, në “News 24”, ku i ftuar ishte analisti i njohur Fatos Lubonja. Sipas analistit, fitorja e Albin Kurtit do të ishte një shpresë e re për Shqipërinë dhe Kosovën, pasi sipas tij, figura e liderit të Vetëvendosjes i jep zë të papërfaqësuarve.
“Të gjitha partitë që ne kemi pasur në pushtet, flasim për partitë më të rëndësishme dhe në Kosovë, në këtë periudhë historike, janë parti që jo vetëm që i kemi provuar, por njëkohësisht unë e lidh dhe me orientimin ideologjik të këtyre partive, ata përfaqësojnë privatizimet, garën, që na ka çuar ne në ekstreme, ku ky sistem ka prodhuar një situatë dramatike. Partitë e mëdha këtu dhe atje që kanë qenë në pushtet kanë pretenduar që po bëjnë hapa të sigurt, por këto janë probleme dhe të tranzicionit. Unë mendoj që nuk kanë qenë probleme të tranzicionit por edhe të partive. E vetmja parti si këtu dhe atje që ka një program, dhe mospërfaqësimin e pjesës së papërfaqësuar është Vetëvendosja. Vetëvendosja është një shpresë për diçka që ka nevojë vendi, të tjerat janë brenda të statukuosë. E kam shprehur për Kosovën dhe Shqipërinë, pasi edhe këtu mungon një parti që mbron interesin publik nga pushteti i kapur nga oligarkia. Është shpresë për Shqipërinë sepse ndihet shumë kjo nevojë. Ulja e taksave përshembull thotë Basha që është politikë që fuqizon të pasurit që fitojnë më shumë dhe besoj se kriza e pandemisë që po shohim tani ka vënë në dukje më të qartë këtë sistem neoliberal. Korrupsioni etj etj, në këtë kuptim duhet votuar them unë”, tha Lubonja.
I pyetur se përse në Shqipëri nuk krijohet një figurë politike si e Albin Kurtit, analisti u përgjigj:
“Mendoj që një nga arsyet kryesore është dhe e kaluara jonë e ndryshme historike në këto vite. Ne kemi pasur një Parti Socialiste që ka abuzuar me të qenit e majtë socialiste, ka ndërtuar një lloj që ka mbuluar në retorike sektorin e të papërfaqësuesve. Flas për Nanon, edhe kur ishte në opozitë. Është dashur ardhja e socialistëve në pushtet, ndërtimi i një oligarkie që vazhdoi me një traditë që kishte lënë Berisha, ne e kemi lidhur shumë politikën e këtyre partive me denoncimin e fenomeneve që kanë qenë përtej të majtës dhe të djathtës. Dua të them që duke u kapur tek denoncimi i fenomeneve ne kemi harruar që ndoshta një parti e majtë duhet të kishte ardhur me një program të majtë. Sigurisht që ka ndikuar dhe fuqia e madhe që kanë kapur shteti dhe mediat. Pra ka një sërë faktorësh. Në Kosovë Kurti ka pasur një avantazh që bashkë me projektin e majtë, ai jo vetëm denoncoi por ka pasur dhe idealin e bashkimit kombëtar. Ai është pak i përzier në programin e tij por është i vetmi që nëse nuk devijon mund të ndërtojë diçka kundër shtetit të kapur aty dhe të punojë për shtetin. Nuk kemi ende një shtet që punon për ne, por prej vitesh punon kundra nesh. Vetëikja e shqiptarëve është gjëja më negative e këtij shteti”, u shpreh analisti.
Analisti nënvizoi se nëse do të ndryshohet sistemi politik në Shqipëri, do të kemi një lloj shprese siç ka Kosova me Albin Kurtin
“Dua të them dhe këtë që reaksioni do të jetë shumë i madh i këtij sistemi për të realizuar këtë lloj shprese. Të dalim nga rruga e gabuar dhe të hyjmë në një rrugë të drejtë. Dihet se në Shqipëri nëse kanë pasur një tentativë Berisha në 2005 dhe Rama në 2013, për mua ka qenë kapje në sistemi menjëherë dhe fjalët e thëna ishin demagogji për të marrë pushtetin dhe jo luftuar sistemin. Sa është individualiteti këtyre problem, apo sistemi, kjo është e vështirë. Kurti jep një garanci më shumë mendoj unë, pasi ka një gatishmëri për të ndërtuar sistemin dhe zhgënjimi që thatë ju do të ishte fatal. Po a keni parë ju ndonjëherë ndërkombëtarë të ngrenë zërin për këtë lloj sistemi, për kapjen e të gjithë mediave të oligarkëve dhe televizioni publik është i dobët. Se ka ngritur njeri si problem nga ndërkombëtarët dhe të tjera çështje si këto. Shikoni kullat që po ngrihen nga krimi. Në thelbin e vet ky është sistemi dhe në Perëndim por atje ka më tepër. Të pasurit që kontrollojnë shtetin janë të pasurit që prodhojnë aviona, por nuk janë kriminelë. Tek ne është degraduar ky sistem. Unë mendoj që Kurti do të bëj gjëra të rëndësishme dhe duhet vënë në qendër të përgjegjësive”, përfundoi Lubonja.
