Arrestime në Gjykatën e Krujës. Burime pranë Prokurorisë së Posaçme bëjnë me dije se në pranga është vënë gjyqtaria e Krujës Enkeleida Hoxha, kryesekretarja e kësaj gjykate dhe avokati Aldo Tabaku.
Gjykata e Posaçme ka miratuar masat e ndalimit për këta persona pas kërkesës së SPAK. Urdhër-ndalimet, ndërkohë, janë ekzekutuar këtë të Enjte nga policia. Ndaj tyre janë ngritur akuzat e korrupsionit, shpërdorimit të detyrës, si dhe ndikimit te funksionarët publik. Janë sekuestruar disa kompjutera e materiale të ndryshme në gjykatë.
Të njëjtat burime kofidenciale bëjnë me dije se SPAK ka prova që të akuzuarit, kundrejt ryshfeteve, kanë liruar persona të ndryshëm nga qelitë, ndër të cilët edhe personazhe të njohur të botës së krimit.
Po ashtu, janë shoqëruar në polici mbi 10 persona. Mes të shoqëruarve ka edhe oficere të policisë gjyqësore, edhe kancelari i gjykatës.
Në orët në vijim, SPAK pritet të dalë me njoftim zyrtar në lidhje me operacionin.
ILD kërkon shkarkimin
Për gjyqtaren Enkeleida Hoxha, ILD ka kërkuar shkarkimin nga detyra me argumentin se magjistratja ka dhënë 6 vendime në harkun kohor të maj 2017 – nëntor 2019 që përbëjnë akte që diskreditojnë figurën e gjyqtarit. Disa nga vendimet kanë të bëjnë me lirimin e disa të dënuarve nga qelia.
Sipas ILD, vrasja e shtetasit Hekuran Billa më 11 qershor 2020 e transmetuar nga media bashkë me të dhëna mbi gjendjen gjyqësore dhe lirimin para kohe të tij, nga i njëjti magjistrat, lirimi para kohe me kusht edhe për të dënuar të tjerë si Ilir Paja kanë bërë që Inspektori i Lartë i Drejtësisë të verifikojë, e më pas të nisë hetimin disiplinor me iniciativë ndaj gjyqtares së Gjykatës së Rrethit Gjyqësor Krujë Enkeleida Hoxha, për shkelje të rënda profesionale që diskretitojnë pozitën dhe figurën e gjyqtarit gjatë ushtrimit të detyrës.
