Deklaratat e ambasadores amerikane Yuri Kim që të mos regjistrohet në zgjedhjet e 25 prillit nuk e kanë penguar Tom Doshin që të kërkojë regjistrimin e partisë së tij në KQZ.
Pak ditë pasi Përfaqësuesja e SHBA në Shqipëri rikujtoi shpalljen e tij “non grata” nga DASh duke kërkuar moskandidimin e tij në 25 Prill, deputeti Tom Doshi depozitoi sot në KQZ kërkesën e Partisë Social Demokrate për të marrë pjesë në zgjedhje.
Kërkesa është bërë me statusin e kryetarit të Partisë Social Demokrate.
Ambasadorja Kim u rikujtoi partive politike të shmangin kandidimin e personave që kanë probleme me ligjin e dekriminalizimit.
“Ndërsa autoritetet zgjedhore të Shqipërisë përgatisin zgjedhjet, ia vlen të kujtohet ky njoftim, i bërë nga Sekretari Amerikan i Shtetit pas shqyrtimit të kujdesshëm të informacioneve të marra. Sigurisht, votuesit shqiptarë meritojnë më shumë se kaq“, shkruante dy ditë më parë ambasadorja Kim.
Në prill 2018 Shtetet e Bashkuara i ndaluan hyrjen në SHBA Tom Doshit dhe familjarëve të tij.
Në vendimin e DASH thuhet se, “Në bazë të ligjeve amerikane, kur Sekretari i Shtetit, ka informacione të besueshme se një zyrtar i huaj është përfshirë në raste madhore korrupsioni, ose shkelje të të drejtave të njeriut, atij dhe familjes së tij të ngushtë i ndalohet hyrja në Amerikë. Sekretari i Shtetit mund t’ia bëjë njoftimin zyrtarit privatisht ose në publik. Në bazë të njoftimit të sotëm, deputeti Doshi, bashkëshortja e tij Xhovana Doshi, vajza e madhe Briana Doshi, djali në moshë madhore James Doshi dhe fëmijët në moshë të mitur nuk lejohen të hyjnë në Amerikë”.
Pak ditë më parë, kryeministri Edi Rama u përfshi në një përplasje publike me ambasadoren amerikane teksa u shpreh se partitë politike nuk janë polici dhe salla torturash.
“Ne kemi ligjin, zbatojmë ligjin. Përgjegjësia e kujtdo që gënjen në vetëdeklarim, është përgjegjësi individuale jo partie!”, do të shprehej Rama.
“Partitë nuk janë drejtori policie, por verifikojnë sipas ligjit dhe sipas ligjit i kemi bërë verifikimet gjithmonë. Nuk kemi ndërmend të ngremë salla torturash në selitë e partive, nëse dikush fsheh diçka”, shtoi më tej kryeministri.
Kerkese per regjistrim dhe nga PD e LSI
Gjithashtu kërkesë për regjistrim kanë dërguar edhe PD, LSI si dhe aleatët e tjerë të selisë blu, bashkangjitur me 5 mijë firmat e mbledhura. Edhe PS ka kërkuar sot regjistrimin për pjesmarrje në zgjedhje.
Taashmë dhe KQZ ka nisur përgatitjen për fletët e votimit, duke paraqitur 5 modele.
Në to do të votohet për partitë ose koalicionet dhe kandidatët. Por nuk lejohet që të zgjidhet një parti, por duke shënuar emrin e listuar nga një forcë tjetër
Komisioni i Ekonomisë dhe i ai Ligjeve i kanë miratuar KQZ fondin prej 130 mln lekësh që do t’i shpërndahen partive politike për zgjedhjet parlmentare të 25 prillit.
