Drejtoresha e Infektivit, Najada Çomo, gjatë fjalës së saj në mbledhjen e Komitetit Teknik të Ekspertëve, është shprehur se ditët e fundit ka pasur një formë të rëndë të Covid-19 te moshat e reja, ku nuk kanë munguar as vdekjet.
“Një informacion të shkurtët mbi pacientët e shtruar në spitalet Covid 1,2,3 dhe 4. Ashtu siç edhe e keni ndjekur nga komunikatat e përditshme të Ministrisë së Shëndetësisë dhe Mbrojtjes Sociale, kemi një shtim të numrit të rasteve në spitale. Ajo që theksohet fortë është shtimi i moshave të reja të shtruar në spitale. Por jo vetëm, kemi forma të rënda të moshave të reja që ndodhen të shtruar nëpër spitale, shoqëruar edhe me humbje jete. Sigurisht, fluksi në spitalet Covid vazhdon të jetë i përballueshëm por i shtuar nga ana numerike. Dhe ajo çka unë doja të thoja si thirrje për popullatën është që, marrja e masave është e detyrueshme për të mbrojtur shëndetin e çdo lloj grupmoshe. E dyta, është shtuar numri i pacientëve të shtruar në terapi intensive dhe super intensive“.
Ajo shtroi se këta të rinj janë pa sëmundje kronike.
“Janë persona pa sëmundje kronike, tashmë janë mosha të reja që janë nuk kanë sëmundje kronike, pra ka një ekspozim të lartë”.
Çomo kërkoi bashkëpunimin e qytetarëve në mënyrë që edhe stërmundimi i bluzave të bardha të marrë fund.
“Ne garantojmë punën tonë, por stërmundimi i bluzave të bardha, popullata shqiptare mund t’i përgjigjet vetëm me respektimin e masave sepse jemi për të mbrojtur shëndetin, do punojmë me çdo kusht deri kur të kemi pacientin e fundit, por popullata duhet të na ndihmojë”, tha Çomo.
Një ditë më parë, Ministria e Shëndetësisë raportoi për 1239 raste të reja infektimi dhe 16 viktima. Ndërsa nga nisja e pandemisë vendi ynë numëron 87528 të infektuar dhe 1488 të vdekur.
