Është shtyrë seanca gjyqësore në ngarkim të shtetasve Redjan Rraja dhe Arjol Halilaj, të akuzuar si të përfshirë në atentatin ndaj prokurorit të Durrësit Arjan Ndoja.
Mosnjoftimi i Ndojas ka bërë që Gjykata Kundër Korrupsionit dhe Krimit të Organizuar të shtyjë seancën.
Rraja dhe Halilaj akuzohen për atentarin e ndodhur në 1 nëntor 2019, pranë Mbikalimit të Shkozetit, ku mbetën të plagosur prokurori Ndoja dhe miku i tij Aleksandër Laho, ndërsa humbi jetën në spital shoferi i prokurorit Andi Maloku.
Redjan Rraja, i afërt i deputetit socialist Rrahman Rraja, akuzohet për veprat penale të “Vrasja e funksionarëve publikë”, mbetur në tentativë, në dëm të shtetasit Arjan Ndoja, “Vrasja në rrethana të tjera cilësuese”, me pasojë vdekjen e shtetasit Andi Maloku dhe mbetur në tentativë në dëm të shtetasit Aleksandër Laho (Pëllumb Muharremi).
Gjithashtu ndaj tij rëndojnë akuzat për “Mbajtja pa leje dhe prodhimi i armëve, armëve shpërthyese dhe i municionit”, “Vjedhja” e kryer në bashkëpunim, “Grupi i strukturuar kriminal”, “Kryerja e veprave penale nga grupi i strukturuar kriminal”, parashikuar nga nenet 79/a – 22, 79/dh-22, 278/1, 2, 134, 28/4, 333/a/2 dhe 334 të K.Penal.
Ariol Mustafa Halilaj, akuzuar se ka kryer veprat penale të “Vrasja e funksionarëve publikë”, mbetur në tentativë, në dëm të shtetasit Arjan Ndoja, “Vrasja në rrethana të tjera cilësuese”, me pasojë vdekjen e shtetasit Andi Maloku dhe mbetur në tentativë në dëm të shtetasit Aleksandër Laho (Pëllumb Muharremi), “Mbajtja pa leje dhe prodhimi i armëve, armëve shpërthyese dhe i municionit”, “Vjedhja” e kryer në bashkëpunim, “Grupi i strukturuar kriminal”, “Kryerja e veprave penale nga grupi i strukturuar kriminal”, parashikuar nga nenet 79/a – 22, 79/dh-22, 278/1, 2, 134, 28/4, 134, 333/a/2 dhe 334 të K.Penal.
