Vllaznia e sezonit aktual ka surprizuar dashamirësit e futbollit teksa kryeson me meritë Kategorinë Superiore. Loja e shkodranëve ka bërë që edhe një nga gazetarët investigativë më të mirë në vendin tonë, Artan Hoxha, të bëjë tifo për kuqeblutë. I ftuar në emisionin Pressing në ABC gjatë mbrëmjes së djeshme ai bëri një panoramë të përgjithshme për futbollin tonë, ndërsa u ndal në veçanti te Vllaznia.
“Unë nisem nga tendenca dhe nga fryma e skuadrës sepse jemi edhe ne prag fushate. Para dy tre javësh kam thënë se jam tifoz me Vllazninë dhe dua ta marrin ata. Kjo është reklamë e mirë për kampionatin sepse konsiderohemi si kampionat i kalkuluar, nëse e fiton Vllaznia bie poshtë kjo. Trajneri mund të jetë gjerman, por je në Shkodër.
Ai duhet ta frenojë skuadrën dhe t’i mbajë me këmbë në tokë. Në ndeshjet e fundit Vllaznia është skuadra me më pak pikë mes gjashtë të parave. Ka rënë tempi dhe kundërshtarët i marrin masat ndaj tyre. Nëse Vllaznia merr pikë të plota me Apoloninë dhe Skënderbeun i jep mundësinë vetes të bëjë gabime më pas.
Vllaznia ka dalë 9 herë kampion, bën 102 vjet. Nga 9 herë që ka dalë kampion, e kam parë 4 herë. Ajo e atëhershmja i shtypte kundërshtarët. Me këtë të sivjetshmen janë të gjithë tifozë. Janë skuadër mesatare dhe kanë mbështetjen e të gjithëve. Shkodranët jetojnë me futbollin.
Kam merak sesi është e mundur që shkodranët të mos hyjnë në stadium në këtë kohë të skuadrës. Kundërshtarët pas saj janë të rrezikshëm, të bëjnë gropën”, tha ndër të tjera Hoxha.
