Mentor Mazrekaj po shkëlqen në këtë sezon të Superiores me skuadrën e Laçit. Fantazisti erdhi pa shumë bujë te kurbinasit pas një pauze të gjatë ndërprerje, ndërsa në urdhrat e trajnerit Shpëtim Duro po dhuron spektakël.
Pikërisht për futbollistin në fjalë foli mbrëmë Gaz Demi. Presidenti i Partizanit tregoi se 32-vjeçari kishte shprehur dëshirën për të veshur fillimisht fanelën e kuqe, por mbyllja e merkatos s’e lejoi atë t’i bashkohej 16 herë kampionëve të vendit.
“Mentor Mazrekaj më bëri mesazh të parin kur kishte vendosur të niste sportin. Për fatin tonë të keq ne na u bllokua merkato dhe s’e morëm dot. Për mua është lojtari më i mirë i kampionatit shqiptar”, tha kreu i klubit të kuq duke treguar simpatinë për futbollistin e kurbinasve.
Një deklaratë kjo që të lë të nënkuptosh se në merkaton e verës mund të ketë zhvillime. Edhe pse lojtari ka rinovuar me kurbinasit, ai e ka thënë hapur që Partizani është shtëpia e tij. Të tillë futbollistë, me karakteristikat e Mazrekajt trajneri Ilir Daja i preferon shumë. Pritet të shihet se çdo të ndodhë me “Menqën” ashtu sikurse të gjithë tifozët e kuq e njohin.
