Kryeministri Edi Rama paralajmëroi këtë të Hënë se mund të kemi një rikthim të ashpërsimit të masave me qëllim parandalimin e përhapjes së koronavirusit. Rama bëri apel që të respektohen masat e vendosura deri më tani nga autoritetet, në mënyrë që të mos ketë shtrëngim të tyre.
Edhe ministrja e Shëndetësisë, Ogerta Manastirliu tha se javët e fundit është vënë re një shtim i rasteve të reja, fataliteteve dhe i shtrimeve në spitale. Nëse situata përkeqësohet, la të kuptohet ministrja, atëherë do kemi një shtrëngim të masave.
“Përsa i përket numrave apo situatës epidemiologjike që do na sillte një vendimmarrje të re përsa i përsa i përket masave shtesë janë disa kritere që vlerësojnë ekspertët, jo vetëm rrijta e numrit të infektimeve, por dhe situata në spitale dhe përqindja e pacientëve në kujdes intensiv. Kemi një situate të kontrolluar të spitaleve, pak të mbingarkuar… Një alert i shtuar dhe që bën pjesë në tërësinë e kritereve të vlërësimit janë dhe fatalitetet. Duke vlerësuar këto kritere në mënyrë dinamike, do kemi edhe masa që do vlerësohen nga ana e Komitetit të Ekspertëve”, tha Manastirliu gjatë një konference online me gazetarët.
