Kryeministri Edi Rama, njëherazi edhe kryetar i PS-së, ka thirrur sot një mbledhje të grupit parlamentar socialist, në kuadrin e përgatitjeve për zgjedhjet e 25 prillit.
Takimi është thirrur në selinë e PS, në orën 08:30, ku të pranishëm do të jenë të gjithë deputetët e PS-së që janë pjesë e Kuvendit.
Pothuajse çdo javë Rama zgjedh të mbledhë drejtuesit politikë në qarqe, për të ndarë edhe detyrat e fushatës, që duket se ka nisur parakohe, për socialistët që synojnë mandatin e tyre të tretë.
Objektivi që është shpallur derimë tani nga Rama, është fitimi i 75 mandateve në zgjedhjet e ardhshme, për ta drejtuar edhe katër vite të tjera vendin me një timon.
Prej disa kohësh, Kryeministri ka nisur një tur takimesh sipas qarqeve, që sipas tij synojnë të promovojnë ato që janë bërë në 8 vitet e qeverisjes së tij.
Nga sondazhet e publikuara deri më tani nga media të ndryshme, rezulton se opozita e bashkuar është fituese e zgjedhjeve të 25 prillit, por në anën tjetër Rama shprehet i sigurtë për mandatin e tretë qeverisës.
Drejtuesve të partive politike u është kërkuar nga amabsadorja amerikane, Yuri Kim, që në listat e kandidatëve për deputet të përfshijnë figura apo emra të pastër, pra që nuk janë subjekt i ligjit të dekriminalizimit. Ndaj kvsaj kërkese të Kim ka reaguar Kryeministri Edi Rama, sipas të cilit partitë nuk janë dhoma torturash, ndërsa përgjegjësia është individuale.
Një ditë më parë Lulzim Basha mblodhi drejtuesit politik që ka caktuar në të gjithë qarqet e vendit, dhe u kërkoi atyre angazhim maksimal.
Sipas Bashës, duke cituar burime nga mbledhja, fitorja e zgjedhjeve është në dorën e demokratëve, dhe ata duhet të japin angazhimin e tyre maksimal që rezultati të jetë ai që presin, rrëzimin nga qeveria të Edi Ramës.
