Nënkryetari i LSI-së, Petrit Vasili, ka reaguar lidhur me deklaratat e Kryeministrit Edi Rama, i cili fajësoi qytetarët për rritjen e rasteve me Covid-19.
Vasili shprehet se gjuha e përdorur nga kryeministri Edi Rama sot gjatë konferencës për situatën e pandemisë së Covid-19 në vendin tonë, për nënkryetarin e LSI-së, Petrit Vasili është larje e duarve nga përgjegjësia, dhe duke bërë fajtor popullin.
“Edi Rama ka kryer faje shumë të rënda, penale në menaxhimin e kësaj pandemie. Kryeministra të tjerë nëpër Europë janë nën hetim, nën kushtet e një menaxhimi që është lule në krahasim me këtë që bën Edi Rama.
Edi Rama është përgjegjës për komunikime dhe deklarime të drejtpërdrejta në dëm të shëndetit dhe jetës së njerëzve. Ka zero impenjim shtetëror. Ka zero mbështetje të qytetarëve në banesë.
Ka zero seriozitet, ka zero impenjim shtetëror, ka zero mbështetje të qytetarëve në banesë, ka zero seriozitet, ka vetëm një strategji. Të dënojnë pafundësisht me gjoba e me masa kufizuese ndërkohë që këto masa e gjoba kanë dhënë një rezultat zero. Pa testim, gjurmim, trajtim ashtu siç duhet mjekësor me tërë parametrat e vetë”, shprehet Vasili.
Sipas tij, shqiptarët nuk i kanë taksirat Edi Ramës që krahas përrallave që tregon dhe turizmit të tij politiko elektoral, të vuajnë infektimet dhe humbjet e jetëve.
“Shqiptarët nuk e meritojnë atë. Shqiptarët nuk meritojnë të jenë pa kryeministër. Shqiptarët meritojnë një zgjidhje të re. Dhe përfundimisht ata janë të bindur që nuk kanë kryeministër. Por kanë një bindje të fortë, një vendim të fortë, të cilin më 25 prill do ta formësojnë duke larguar këtë hiç kryeministër, këtë të paaftë kryeministër, këtë të pazotin, por njëkohësisht do të largojnë dhe një kryeministër të lig, që luan politikisht dhe me fatkeqësinë jetën dhe shëndetin e tyre”, tha Vasili.
