Kryetari i Partisë Demokratike Lulzim Basha lëshoi akuza ndaj kryeministrit Edi Rama, që sipas tij, i ka braktisur qytetarët dhe premtoi se do të punojë për ta.
“Tomas Rid, një filozof i njohur i 300 viteve më parë thoshte: Zinxhiri është aq i fortë sa hallka e tij më e dobët. Dhe kishte të drejtë. E gjithë shoqëria jonë është aq e fortë sa hallka e jonë më e dobët. I gjithë vendi ynë është aq i fortë, sa hallka e tij më e dobët. Dhe kjo është arsyeja se pse nuk mund të lëmë askënd pa përkrahje. Kjo është arsyeja për detyrë të kujdesemi për njerëzit në nevojë”, tha Basha.
Kryedemokrati u bëri apel qytetarëve të votojnë PD dhe planin e saj në zgjedhjet e 25 Prillit.
Plani për mirëqënien sociale
Kryedemokrati premtoi rritjen e pensioneve për 650 000 pensionistët shqiptarë, dy herë më shumë se norma e inflacionit dhe të paktën 5% në vit.
Basha tha se do dyfishohet menjëherë asistenca ekonomike për të gjitha familjet në nevojë.
“Angazhohem që njerëzit me aftësi të kufizuara do të jenë pjesë reale e vendimmarrjes të qeverisjes tonë dhe jo thjesht përfitues pasivë apo viktima të indiferencës, përbuzjes apo korrupsionit qeveritar. Ata do të jenë pjesë e këshillimeve dhe vendimeve mbi hartimin dhe zbatimin e reformave sociale që kanë të bëjnë drejtpërdrejtë”, shtoi.
“Angazhohem për subvencionim të plotë të interesave për kredi për shtëpi për 20 000 familje dhe çifte të reja. Për të ardhmen tonë, për ata që kemi detyrë t’ju sigurojmë kushtet më të mira dhe mundësinë për sukses në jetë. Po ua them fare qartë, ne do të paguajmë 100%të interesave bankare, për çdo kredi që një çift i ri apo një familje e re merr për të blerë një banesë. 5000 të tilla në vit gjatë katër viteve të para, 20 000 çifte dhe familje të reja do të përfitojnë subvencionimin 100% të interesave të kredive që do të marrin për banesën e tyre”,
Basha tha se çdo familje do të përfitojë për çdo të porsalindur një pagesë mujor prej 3 mijë lekësh të reja, për 5 vitet e para të jetës.
