Referuar shifrave zyrtare të Ministrisë së Shëndetësisë, në 6 ditët e para të muajit shkurt kanë humbur jetën 66 pacientë të shtruar në spitalet Covid.
Shifrat e humbjes së jetëve mund të jenë edhe më të larta, referuar faktit se në të paktën 5 spitale rajonale trajtohen rastet me koronavirus, që nuk llogariten në raportimet e Ministrisë së Shëndetësisë, apo te rradhët e pacientëve që kurohen në kushte shtëpie, që sërisht nuk raportohen.
Sipas raportimeve zyrtare, nga fillimi i pandemisë kanë humbur jetën 1446 persona, ndërkohë që sipas statistikave të INSTAT, mbi numrin e vdekjeve përgjatë 2020, janë mbi 6 mijë të tilla më shumë se viti 2019.
Gjithashtu në 6 ditët e para të shkurtit, referuar shifrave të raportuara zyrtarisht janë rreth 7 mijë persona të prekur, ndërsa është rritur numri i pacientëve që po trajtohen në spitalet Covid.
Të gjitha këto shifra tregojnë një dalje jashtë kontrollit të pandemisë në Shqipëri, ndërsa nga deklarimet publike të anëtarëve të Komitetit Teknik përgjegjësia hidhet te qytetarët, që nuk respektojnë masat.
Testimet mbeten në shifra të ulëta, edhe pse ka pasur një rritje krahasuar me numrat e mëparshëm, ndërsa procesi i vaksinimit është përdorur si një show dhe propogandë nga Qeveria.
Epidemiologët paralajmërojnë shtimin e rasteve me Covid, ndërsa është hedhur idea se mund të ketë një shtim të masave kufizuese, kjo referuar orës policore.
Ministria e Shëndetësisë vijon show me aplikimin e testeve të shpejta në disa prej qendrave shëndetësore, ndërkohë që prej muajsh në shumë prej shteteve, përfshirë edhe ato fqinje, po përparohet me procesin e vaksinimeve.
Muaji shkurt – Shifrat
1 shkurt-2960 testime, 498 të shëruar, 865 raste të reja dhe 13 humbje jete
2 shkurt-3856 testime, 455 të shëruar, 942 raste të reja dhe 5 humbje jete
3 shkurt-3849 testime, 581 të shëruar, 1007 raste të reja dhe 6 humbje jete
4 shkurt-3974 testime, 585 të shëruar, 1052 raste të reja dhe 14 humbje jete
5 shkurt-4270 testime, 676 të shëruar, 1089 raste të reja dhe 15 humbje jete
6 shkurt-4539 testime, 656 të shëruar, 1130 raste të reja dhe 13 humbje jete
